Ел Тәуелсіздігінің 30 жылдығы аясында мемлекеттік наградалармен салтанатты марапаттау рәсімі өтті,
«Құрмет» орденімен марапатталғандар: Қазақстанның еңбек сіңірген қайраткері, жоғарғы санаттағы қоюшы-балетмейстер Айгүл Тәти; Қазақстанның еңбек сіңірген әртісі, Қазақстан Республикасы білім саласының құрметті қызметкері, «Еңбек ардагері» медалінің иегері, ұстаз-репетитор Майра Қадырова; «Астана Балет» театрының симфониялық оркестрінің бас дирижері Арман Оразғалиев.
Театрдың жетекші солисттері Айжан Мұқатова, Дарина Қайрашева, Сүндет Сұлтанов, бірінші солист Риза Қанатқызы, «Астана Балет» театрының ұстаз-репетиторы Әсел Абақаева «Ерен еңбегі үшін» медалімен; өндірістік-техника қызметінің жетекшісі Өмірбек Болатов – Қазақстан Республикасының құрмет грамотасымен марапатталды.
Мәдениет, өнер және спорт саласының қайраткерлеріне мемлекеттік наградаларды Қазақстан Республикасы Мәдениет және спорт министрі Ақтоты Райымқұлова табыстады.
Айта кетейік, «Құрмет» орденімен экономика, әлеуметтік сала, ғылым және мәдениет, білім беру ісін дамытуға еңбек сіңірген, мемлекеттік органдарда мінсіз қызмет атқарған және белсенді қоғамдық қызмет еткен азаматтар марапатталады. «Ерен еңбегі үшін» медалімен экономика, әлеуметтік сала, ғылым, мәдениет және мемлекеттік қызметте еңбек жетістігін көрсеткен азаматтар марапатталады.
«Астана Балет» Театрының ұжымы сіздерді лайықты марапаттарыңызбен құттықтап, кәсіби жетістіктеріңіз арта беруіне тілектестігін білдіреді!