"Астана Балет" сахнасында «Жолдан тайғандар» бір актілі балетінің премьерасы өтеді
Заманауи балеттің жауһарына баланған «Жолдан тайғандар» елордада алғаш рет көрсетіледі
1-2 сәуірде "Астана Балет" театрының сахнасында «Falling Angels» («Жолдан тайғандар») бір актілі балетінің премьерасы өтеді. 30 жылдан астам уақыт бойы әлемнің үздік сахналарында көрсетіліп жатқан, чех балетмейстері Иржи Килианның бұл туындысы "Қара және ақ" атты балетінің бір бөлімі. Килиан спектакльдерін репертуарына қосуға әлемнің үздік театрларының бәрі асық. Ал, бишілер оның хореографиясын орындауды абырой санайды.
Иржи Килиан хореографиясы мен Стивен Райхтың дауылпаз композициясының үндестігінің нәтижесінде сегіз балеринаның ғажайып биі пайда болды. Ал, хореографтың өзі "Falling Angels" - біздің мамандық туралы балет" дейді. Бір атап өтерлігі, оның туындысы ғажайып музыкалық әуездігімен, монохромдық эстетикасымен және бидің әлемдік деңгейімен ерекшеленеді. Килианның балеті - сан-түрлі сезімдердің бұлқынысы іспетті: сезімтал әрі ғажайып би пластикасы өн бойыңызды баурап әкетеді.