22-шілдеде «Астана Балет» театрында Корей мәдениетінің фестивалі өткізіліп, көрермен қауым мен фестиваль қонақтары B-Boying би тобы мен K-Pop жұлдыздарының өнерін тамашалап қана қоймай, Корея мәдениетімен таныстыратын ойын-сауық бағдарламасына да қатыса алады.
Іс-шара сағат 16:00 «Астана Балет» театры ғимаратының алдындағы алаңқайда басталып, корейлік жазғы десерт «бинсудың», дәстүрлі шай мен токпокки және такканчжон сынды корей тағамдарының дәмін татып, дәстүрлі ойындарын ойнап, жапсырма-тату салу және т.б. көңіл көтерер ойын-сауыққа қатыса аласыз. Ал, сағат 17:00 «Астана Балет» театрының сахнасында іс-шараның концерттік бөлігі басталады: көрермен қауым JUSTEVEE CREW B-Boying би командасы және TRENDZ K-Pop музыкалық тобының өнерін тамашалай алады.
JUSTEVEE CREW командасы 2017 жылы Кан Гонун бастамасымен құрылды. JUSTEVEE CREW жай ғана көркемөнерпаздар тобы емес, олар – өнер көрсету, оқыту, контент жасау, бейне түсіру және іс-шараларды жоспарлау сияқты нәрселермен өз бетінше айналысатын шығармашылық топ. Әдетте, би тобын тек бимен айналысатын адамдар ретінде қабылдайды. JUSTEVEE CREW – би арқылы көп нәрсені жасауға болатындығын көрсететін, сонымен қатар, шығармашыл адамның қызметінің шекарасын кеңейтуге болатындығын дәлелдеген команда.
TRENDZ тобы «TNT (Truth&Trust)» дебюттік әнімен күшті старт жасады. Одан кейін әсерлі қойылымы бар «Villain» атты әнді, «WHO [吼]» деген сұраққа жанұшыра жауап іздеген жанның арпалысы туралы әнді, жеңіл-желпі сүйкімділікті бейнелейтін «CLIQUE» атты әнді, адасқан жиһангездің абдырап қалған күйін суреттейтін «VAGABOND» атты әнді, үміт сыйлайтын «NEW DAYZ» атты әнді және т.б. шығарды. Олар «перформанстың жаңа көшбасшылары» атағына лайық еңбек етіп, түрлі қойылымдарды көрсетіп, үздіксіз ізденіс үстінде еңбек етіп келеді.
Корея Республикасы елшілігінің Корей мәдени орталығымен бірлесіп, «Астана Балет» театры елорда қонақтары мен тұрғындарын 2022-2023 жж. жоспарланған «Корея Республикасы мен Қазақстан Республикасы арасындағы мәдени алмасу жылы»» және «Кореяға барған жыл» шарасын мерекелеуге шақырады.