«Астана Балет» театры жария еткен «Тырнақалды туынды» («Проба пера») атты 1-25 қазан аралығында өткен байқауының нәтижесі де мәлім болды. Қазылар алқасын авторлардың театр қойылымдарына, жалпы өнер атаулыға ерекше ықыласы таң қалдырды. Осы байқаудың негізгі әрі басты нәтижесі осы болса керек. Қазылар алқасы байқауға қатысқан жұмыстарды оқып, ерекше толқыды.
Байқауға ересек және жасөспірім көрермендердің атынан отыздан астам рецензия тапсырылды. Өкінішке қарай, кейбір мақалалар ақшалай жүлдеге сай болмады, себебі, балет спектакльдеріне жазылатын рецензияларға қойылатын талаптарға сәйкес келмеді.
Байқауға қатысқан рецензиялардың мазмұны біріне-бірі өте жақын болды. Бәріне ортақ бір ерекшелік – авторлар өз эмоцияларын, спектакльден алған әсерін суреттеді. Ал, байқауды ұйымдастырушылар рецензияларды, яғни, қойылымның артықшылықтары я кемшіліктері жайлы, әртістердің еңбегі жайлы сыни ескертпелерді күтіп еді. Қазылар алқасы спектакль қоюшылармен пікірталас болғанын қалады. Осы талапқа бәрі сай болды деп айта алмаймыз. Дегенмен, бұл алғашқы тәжірибе ғой.
Қазылар алқасының пайымдауынша, жүлдегер атанған рецензия авторлары спектакльдердің артықшылықтары мен кемшілігін, қойылым авторларының шығармашылық мақсат-мұратын, яғни, сахна, жарық, музыка, актерлік ойын арқылы көмкерілген қойылымның түпкі ойын мейлінше айқын суреттей алды. Сонымен қатар, резенция жазылғанда талдау жасалып жатқан туындыға қатысты балет терминдері келтіріліп, әр пікір нақты мысалдармен нақтылануы тиіс. Қазылар алқасының шешімі бойынша, жеңімпаз атанғандар: Әсел Исмағамбетова, Анар Рысқұлова, Әнел Мырзағұлова, Талғат Даденов. Жүлде қорындағы 100 000 теңгені осы төрт жеңімпазға тең бөлу туралы шешім қабылданды.
Сонымен қатар, қазылар алқасы қызығушылық танытып, сайысқа қатысқанын рецензия авторларына ілтипатын білдіріп, ынталандыру сыйлығы ретінде театрдың кез-келген спектакліне 2 адамға арналған шақыру билетін беруді ұйғарды. Спектакльді байқауға қатысушылардың өздері таңдап, pressa@astanaballet.kz хат жазып, шақыру билетін ала алады.
Авторлар өз білімі мен қабілетін танытып қана қоймай, өз пікірімен бөліскені қуантып отыр. Өздеріңіз секілді дарынды, алға ұмтылушы әрі айналасындағы құбылыстарға бей-жай қарамайтын жандардың арқасында еліміздің хореография өнерінің өрісі кеңейіп, дамып жатыр.
«Астана Балет» театры «Тырнақалды туынды» («Проба пера») байқауына қатысушылар мен жеңімпаздарды құттықтап, алғысын білдіреді. Байқауға қатысушылардың бәріне тілейтініміз тек сәттілік! Бұл байқау жыл сайын өтеді деп үміттенеміз. Биыл бағы жанбаған қатысушылардың келесі сайыста жұлдызы оңынан туады деп ойлаймыз.