«Астана Балет» театры жастарды театр өнеріне баулу үшін, студенттерге арналған «Student’s time» науқанын бастайды. Оған сәйкес, студенттер 14 қазандағы спектакльге билетті 50% жеңілдікпен сатып ала алады. Тек студент билетін көрсетсе болғаны. Бұл науқан отандық һәм шет елдік ЖОО студенттеріне арналған.
Театр басшылығы, әзірше бұл сынақ ретінде өткізілмекші екенін, егер көпшілік тарапынан қолдау тауып жатса, онда тұрақты түрде өткізілетін шараға айналмақ.
Науқанға А.Адамның «Жизель» спектаклі алынып отыр. Бұл спектакльде байырғы қиыл-ғажайып сюжет жаңа қырынан ашылады. Романтизм шыңына баланған аңыз-балеттің тек рухани шырағы мен поэтикалық сарыны сақталған. Генрих Гейне қағазға түсірген өсиет бойынша, тұрмысқа шықпаған бойжеткендер, ғашығы көзіне шөп салған бойда виллистерге айналатын. Түнде молаларынан атып шығатын олар өздерінің қыршыннан қиылған өмірлері үшін кек алатын. Алдына кездескен кез-келген ер адамды биге елітіп, ақыры ажал құштыратын.
Билеттерді театр кассасынан алуға болады. Кассаның жұмыс тәртібі: сағат 11:00 - 19:00 дейін, байланыс телефоны: +7 7172 62 12 12.
Анықтама есебінде:
Елордалық «Астана Балет» театры өнер сүйер қауым тарапынан қолдау тауып келе жатқан жас театр. Театр классика, модерн және халық биін ұштастыра отырып, қойылым жасайды.Театрдың мақсаты – өзінің бірегей шығармашылық бейнесін қалыптастырып, классикалық мұраның үздік үлгілерін сақтай отыра, пластика тілін жарқын, есте қаларлық жаңашылдықпен толықтыра түсу.