Төрт көзіміз түгел үйде отырып-ақ, күллі әлемді тамашалай аламыз. Театрлар, музейлер мен филармониялар онлайн тәртібіне ауысып, спектакльдері мен экскурсияларын таратып отыр. «Астана Балет» те әріптестерінің бастамасын қолдап, өзінің инстаграм парақшасында әлемдік балет жұлдыздарымен, хореографтар мен фотосуретшілермен тікелей сұхбат күйінде өтетін «Театр онлайн» атты танымдық топтамасын жарыққа шығармақшы. Сұхбатты «Астана Балет» театрының жетекші солисті, «Тылсым сахна» жобасының авторы – Дилара Шомаева жүргізеді. Балет жайлы білгіңіз келгеннің бәрі: бэкстейдж, мамандықтың қыр-сыры мен балет әртістерінің өмірі, енді онлайнда қолжетімді.
Театрдың @astanaballet инстаграмындағы алғашқы тікелей эфир 6-сәуірде, сағат 20:00 Мажарстан мемлекеттік опера театрының примасы Әлия Танықпаевамен өтеді. А. Селезнев атындағы хореография училищесінің түлегі Әлия Пермь мен Люксембургте өткен халықаралық балет әртістері конкурстарының жеңімпазы. Цюрих театры, Вена операсы, Империялық орыс балеті мен Абай атындағы МАОБТ қызмет атқарған.
Алдағы тікелей эфирлердің кестесі:
7-сәуір, сағат 20:00. Айдос Зақан, Аалто театрының солисті. Эссен, Германия. Айдос – қазіргі таңдағы айтулы балет әртістерінің бірі. Бостон балеті, Михайлов театры және өзге де өнер ордаларында қызмет атқарған.
8-сәуір, сағат 20:00. Руслан Пронин, РФ еңбек сіңірген әртісі, балетмейстер-репетитор, хореограф Юрий Григоровичтің ассистенті. 2019 жылы Оксана Цветницкаямен бірлесіп, «Астана Балет» театрының сахнасында үш актілі «Махаббат туралы аңыз» балетін қойған.
10-cәуір, сағат 20:00. Берлин мемлекеттік театрының примасы Яна Саленкомен тікелей эфир өтеді. Ол Deutscher Tanzpreis Zukunft (2010) сыйлығы мен өзге де марапаттардың иегері. Репертуарында — барлық дерлік жетекші классикалық партиялар бар: Жизель, Аврора, Одетта/Одилия, Джульетта және т.б.
Сонымен қатар, тікелей эфирге Михайлов театрының премьері Леонид Сарафанов, балет фотографы әрі WorldOfBallet.com шеф-редактор Дарьян Волкова, петерборлық фотосуретші әрі «Территория балета» жобасының авторы Алексей Кривцов және өзгелері шығады.
Тікелей эфир кестесіне қатысты барлық мәліметті «Астана Балет» театрының @astanaballet әлеуметтік желілерінен таба аласыз.