1-желтоқсанда еліміздің дарынды жастарын қолдау саясатының аясында «Либретто», «Хореография», «Музыка» және «Сценография» аталымдары бойынша жеңімпаздарды анықтап, төрт іріктеу кезеңінен тұратын «Ашық сахна» І Республикалық байқауы жарияланған болатын. Ұйымдастырушылардың айтуынша байқауға еліміздің түкпір-түкпірінен 56 үміткер қатысыпты.
Әр аталым бойынша жеңімпазға 1 000 000 теңге көлемінде қаржылай жүлде үлестіріліп, «Астана Балет» театрының әртістері орындайтын толыққанды хореографиялық туындыны сахналауға қатысуға мүмкіндік беріледі.
«Либретто» аталымы бойынша Алданова Мәдина Ерлановна жеңімпаз атанды.
«Мен үшін бұл күтпеген жаңалық болды. Әлі де қобалжып тұрмын. Жаңа спектакль шығаруға ат салысатыныма қуаныштымын. Сөз жоқ, бұл өмір бойы естен кетпес өте қызықты тәжірибе болмақ. Өз басым «Астана Балет» театрына жиі келемін. Қызықты шешімдері мен ауқымды декорациялары үнемі көңіліңді елең еткізеді. Осындай мүмкіндік беріп отырған Байқауды ұйымдастырушыларға алғыс айтқым келеді», - деген ойымен бөлісті, «Либретто» аталымының жеңімпазы Мәдина Алданова.
Сонымен қатар, келесі аталымдар бойынша жеңімпаздар да мәлім болды:
«Музыка» - Жайым Арман Айтқалиұлы, Базарқұлова Шырын Әмірбековна, Қалмағанбетов Дастан Серікұлы, Байбеков Олжас Мырзақасымұлы және Қожабеков Ілияс Сәбидоллаевич.
Байқаудың екінші кезеңінде «Музыка» аталымы ойынша байқауға қатысушылар ұзақтығы 10-20 минуттан аспайтын, симфониялық оркестр құрамына лайықталған авторлық музыкалық туынды шығаруы тиіс.
«Хореография» - Диқанбаева Әсия Маратовна, Сиязбек Уәлитбек Садықұлы, Меттыбаева Томирис Ерсенқызы, Мұратбекова Мәдина Болатовна, Цой Анна Вадимовна және Самарбаева Әмина Бауыржановна.
Үшінші кезеңде «Хореография» аталымы бойынша жеңімпаз анықталады. Бұл айналымда хореографиялық және режиссерлік шешімнің даралығына, көркемдік тартымдылығы мен көркем ойына мән беріледі.
«Сценография» - Рычкова Александра Юрьевна, Ысқақов Асқар Өміржанович, Жорқабаева Гүлдана Тұрсыновна, Тұяқов Ерлан Есенгелдиевич және Түстікбаев Қуат Жақсылықович.
Байқаудың төртінші кезеңінде «Сценография» аталымы бойынша жеңімпаз жаңа хореографиялық туындыға арналған көркемсуретті эскиздер мен сахна костюмдерін ұсынады.
Байқаудың қорытындысы мен жеңімпаздарды марапаттау рәсімі «Астана Балет» театрының сахнасында 2023 жылғы 1-мамырда өтетінін естеріңізге саламыз. Сонымен бірге, сол күні «Ашық сахна» байқауының жеңімпаздары шығарған хореографиялық туындының премьерасы өтетін болады.
Байқаудың құрылтайшылары – Бас серіктес «Самұрық-Қазына» АҚ және әлеуметтік серіктес - «Samruk-Kazyna Trust» корпоративті қорының қолдауымен, «Балет пен ұлттық биді дамыту және қолдау қоры» Жеке қоры және «Астана Балет» театры.